യാത്രക്കാരുടെ ലഗേജ് വീട്ടിൽനിന്ന് ശേഖരിക്കാൻ കൊച്ചി വിമാനത്താവളം; പുതിയ സേവനത്തിന് പരീക്ഷണം

കൊച്ചി: വിമാനയാത്രക്കാരുടെ ലഗേജ് വീട്ടിൽനിന്ന് ശേഖരിച്ച് വിമാനത്താവളത്തിലെത്തിക്കുന്ന പുതിയ സേവനത്തിന്റെ സാധ്യത പരിശോധിച്ച് കൊച്ചി അന്താരാഷ്ട്ര വിമാനത്താവളം (സിയാൽ). പദ്ധതിയുടെ പ്രായോഗികത പരിശോധിക്കുന്നതിനായി ഒരു ഏജൻസിക്ക് പരീക്ഷണത്തിന് അനുമതി നൽകിയിട്ടുണ്ട്. പരീക്ഷണത്തിന്റെ ഫലം വിലയിരുത്തിയ ശേഷമായിരിക്കും വിപുലമായ നടത്തിപ്പിൽ അന്തിമ തീരുമാനമെടുക്കുക.

രണ്ട് ഘട്ടങ്ങളിലായി സേവനം നടപ്പാക്കാനാണ് നിലവിലെ ആലോചന. ആദ്യഘട്ടത്തിൽ ഏജൻസി യാത്രക്കാരുടെ വീടുകളിൽനിന്ന് ലഗേജ് ശേഖരിച്ച് വെയർഹൗസിലെത്തിക്കും. തുടർന്ന് വിമാനത്താവള ടെർമിനലിന് പുറത്തുള്ള നിശ്ചിത കേന്ദ്രത്തിലേക്ക് ലഗേജ് മാറ്റും.

സുരക്ഷാ മാനദണ്ഡങ്ങൾ അനുസരിച്ച് യാത്രക്കാരനില്ലാതെ ലഗേജ് ടെർമിനലിനുള്ളിലേക്ക് കൊണ്ടുപോകാൻ കഴിയില്ല. അതിനാൽ യാത്രക്കാരൻ വിമാനത്താവളത്തിലെത്തിയ ശേഷം നിശ്ചിത കേന്ദ്രത്തിൽനിന്ന് ലഗേജ് ഏറ്റുവാങ്ങി ടെർമിനലിനുള്ളിലേക്ക് കൊണ്ടുപോകേണ്ടിവരും. വീട്ടിൽനിന്ന് ശേഖരിക്കുന്നതുമുതൽ വിമാനത്താവളത്തിലെത്തുന്നതുവരെയുള്ള ലഗേജിന്റെ നീക്കം ട്രാക്ക് ചെയ്യാനുള്ള സംവിധാനവും പദ്ധതിയുടെ ഭാഗമായാണ് പരിഗണിക്കുന്നത്.

കൂടുതൽ ലഗേജുകളുമായി യാത്ര ചെയ്യുന്ന കുടുംബങ്ങൾക്കും മുതിർന്ന യാത്രക്കാർക്കും പുതിയ സംവിധാനം പ്രയോജനപ്പെടുമെന്നാണ് പ്രതീക്ഷ. എറണാകുളത്തിന് പുറത്തേക്കും സേവനം വ്യാപിപ്പിക്കാനുള്ള സാധ്യത പരിശോധിക്കുന്നുണ്ട്. വിമാനത്താവളത്തിൽനിന്ന് ഏകദേശം 200 കിലോമീറ്റർ വരെയുള്ള പ്രദേശങ്ങൾ പരിഗണനയിലുണ്ടെങ്കിലും അന്തിമ സേവനപരിധി ഇതുവരെ നിശ്ചയിച്ചിട്ടില്ല.

കൊച്ചിയിൽ വിമാനമിറങ്ങുന്ന യാത്രക്കാർക്കും സേവനം ലഭ്യമാക്കാനാണ് ആലോചന. വിമാനത്താവളത്തിലെത്തിയ ശേഷം ടെർമിനലിന് പുറത്തുവച്ച് ലഗേജ് ഏജൻസിക്ക് കൈമാറിയാൽ അത് യാത്രക്കാരൻ നിർദേശിക്കുന്ന സ്ഥലത്ത് എത്തിക്കുന്ന സംവിധാനമാണ് പരിഗണിക്കുന്നത്.

വെബ്സൈറ്റ് വഴിയായിരിക്കും ബുക്കിങ് സംവിധാനം ഒരുക്കുക. ലഗേജിന്റെ ഭാരവും എത്തിക്കേണ്ട ദൂരവും അടിസ്ഥാനമാക്കിയുള്ള നിരക്കുകളാണ് പരിഗണനയിൽ. എന്നാൽ സേവനനിരക്കുകൾ സിയാൽ ഇതുവരെ അന്തിമമാക്കിയിട്ടില്ല.

രണ്ടാംഘട്ടത്തിൽ വിമാനത്താവളത്തിലെ മീറ്റ് ആൻഡ് ഗ്രീറ്റ്, ബാഗേജ് അസിസ്റ്റൻസ് തുടങ്ങിയ സേവനങ്ങളുമായി ഹോം ലഗേജ് സംവിധാനത്തെ ബന്ധിപ്പിക്കുന്നതും പരിഗണനയിലുണ്ട്.

നിലവിൽ പദ്ധതി പരീക്ഷണ, സാധ്യതാ പരിശോധനാ ഘട്ടത്തിലാണ്. സേവനം ഔദ്യോഗികമായി ആരംഭിക്കുമോ, എപ്പോൾ ആരംഭിക്കും തുടങ്ങിയ കാര്യങ്ങളിൽ സിയാൽ അന്തിമ തീരുമാനം പ്രഖ്യാപിച്ചിട്ടില്ല.