കുട്ടികൾക്ക് പ്രഭാതഭക്ഷണവുമായി ‘സുഭിക്ഷം തൃക്കാക്കര’

കൊച്ചി: സ്കൂൾ കുട്ടികളുടെ ദിവസം വിശപ്പോടെ ആരംഭിക്കാതിരിക്കാൻ ലക്ഷ്യമിട്ട് തൃക്കാക്കര മണ്ഡലത്തിൽ ‘സുഭിക്ഷം തൃക്കാക്കര’ പ്രഭാതഭക്ഷണ പദ്ധതി തുടരുന്നു. തൃക്കാക്കര എംഎൽഎ ഉമ തോമസിന്റെയും പി.ടി. തോമസ് ഫൗണ്ടേഷന്റെയും നേതൃത്വത്തിലാണ് പദ്ധതി നടപ്പാക്കുന്നത്.

മണ്ഡലത്തിലെ 28 സ്കൂളുകളിലെ 5,071 കുട്ടികൾക്കാണ് പദ്ധതിയുടെ പ്രയോജനം ലഭിക്കുക. എൽ.കെ.ജി, യു.കെ.ജി, എൽ.പി, യു.പി വിഭാഗങ്ങളിലെ കുട്ടികൾക്ക് സൗജന്യമായി പ്രഭാതഭക്ഷണം നൽകുന്നതാണ് പദ്ധതി. ഏകദേശം ഒരു കോടി രൂപ ചെലവിൽ CSR സഹായത്തോടെയാണ് പദ്ധതി നടപ്പാക്കുന്നത്.

കുട്ടികൾ വിശന്ന വയറോടെ ക്ലാസ് മുറികളിൽ ഇരിക്കേണ്ട സാഹചര്യം ഒഴിവാക്കുകയും പഠനത്തോടൊപ്പം അവരുടെ ആരോഗ്യത്തിനും പോഷകാഹാരത്തിനും കരുതൽ നൽകുകയും ചെയ്യുകയാണ് പദ്ധതിയുടെ ലക്ഷ്യം.

തൃക്കാക്കര മണ്ഡലത്തിൽ നേരത്തെയും ‘സുഭിക്ഷം തൃക്കാക്കര’ പദ്ധതി നടപ്പാക്കിയിരുന്നു. 2025-ൽ 28 സർക്കാർ, എയ്ഡഡ് എൽ.പി, യു.പി സ്കൂളുകളിലെ 7,081 വിദ്യാർത്ഥികൾക്ക് 165 അധ്യയനദിനങ്ങളിൽ പ്രഭാതഭക്ഷണം നൽകുന്നതിനായി പി.ടി. തോമസ് ഫൗണ്ടേഷന്റെ സഹകരണത്തോടെ ബി.പി.സി.എല്ലിന്റെ CSR പദ്ധതിയുടെ ഭാഗമായി ഏകദേശം 98 ലക്ഷം രൂപ ചെലവിട്ടിരുന്നു.

ഈ വർഷത്തെ പദ്ധതിയുടെ ഉദ്ഘാടനം തൈക്കൂടം സെന്റ് അഗസ്റ്റിൻസ് എൽ.പി സ്കൂളിൽ നടൻ ജയസൂര്യ നിർവഹിച്ചു. എറണാകുളം ജില്ലാ കളക്ടർ ജി. പ്രിയങ്ക, ഇന്ത്യൻ വോളിബോൾ താരം ടോം ജോസഫ്, തൃക്കാക്കര നഗരസഭ ചെയർപേഴ്സൺ റാഷിദ് ഉള്ളംപിള്ളി തുടങ്ങിയവർ ചടങ്ങിൽ പങ്കെടുത്തു.

ഒരു മണ്ഡലത്തിലെ ആയിരക്കണക്കിന് കുട്ടികൾക്ക് സ്കൂൾ ദിനങ്ങളിൽ പ്രഭാതഭക്ഷണം ഉറപ്പാക്കുന്ന പദ്ധതിയെന്ന നിലയിലാണ് ‘സുഭിക്ഷം തൃക്കാക്കര’ ശ്രദ്ധ നേടുന്നത്. കുട്ടികളുടെ വിദ്യാഭ്യാസത്തിനൊപ്പം പോഷകാഹാരവും ഉറപ്പാക്കാനുള്ള സാമൂഹിക ഇടപെടലായാണ് പദ്ധതി മുന്നോട്ടുപോകുന്നത്.