കൊച്ചി: കേരളത്തിൽ 1800 ഡോക്ടർ തസ്തികകൾ പുതുതായി സൃഷ്ടിക്കുമെന്ന് ആരോഗ്യമന്ത്രി കെ. മുരളീധരൻ. സർക്കാർ ആശുപത്രികളുടെ പ്രവർത്തനം ശക്തിപ്പെടുത്തുന്നതിനുള്ള നടപടിയുടെ ഭാഗമായി സ്പെഷ്യലിസ്റ്റ് ഡോക്ടർമാരുടെ തസ്തികകളും ഇതിൽ ഉൾപ്പെടുത്തും.
ആരോഗ്യമേഖലയിൽ നിലവിലുള്ള 500 നഴ്സ്, ഫാർമസിസ്റ്റ് ഒഴിവുകൾ നികത്തുന്നതിനുള്ള നടപടികളും സർക്കാർ സ്വീകരിക്കും. ഇതുസംബന്ധിച്ച് ധനവകുപ്പിന്റെ ചുമതലയുള്ള മുഖ്യമന്ത്രിക്ക് കത്ത് നൽകിയിട്ടുണ്ടെന്നും മന്ത്രി അറിയിച്ചു.
സർക്കാരിന്റെ നൂറുദിന കർമപരിപാടിയുടെ ഭാഗമായി ചോറ്റാനിക്കര, തോട്ടൂർ, കൂവപ്പടി എന്നിവിടങ്ങളിലെ പ്രാഥമികാരോഗ്യ കേന്ദ്രങ്ങളുടെ കെട്ടിടനിർമാണം ഉദ്ഘാടനം ചെയ്ത് സംസാരിക്കുകയായിരുന്നു മന്ത്രി.
ആവശ്യത്തിന് ഡോക്ടർമാരുടെ സേവനം ഉറപ്പാക്കി ജില്ലാ ആശുപത്രികളിൽ മുഴുവൻ സമയ ചികിത്സാ സംവിധാനം ശക്തിപ്പെടുത്തുകയാണ് ലക്ഷ്യം. രോഗികളുടെ എണ്ണത്തിന് അനുസരിച്ച് സർക്കാർ ആശുപത്രികളിലെ സൗകര്യങ്ങളും വർധിപ്പിക്കുമെന്ന് മന്ത്രി പറഞ്ഞു.
ഡോക്ടർമാർ മുതൽ ശുചീകരണ ജീവനക്കാർ വരെയുള്ള ആരോഗ്യപ്രവർത്തകരുടെ ഏകോപിത പ്രവർത്തനമാണ് സർക്കാർ ആശുപത്രികളുടെ കാര്യക്ഷമമായ പ്രവർത്തനത്തിന് അനിവാര്യമെന്നും മന്ത്രി വ്യക്തമാക്കി.
0 Comments