സോനം വാങ്ചുക്കിൻ്റെ അറസ്റ്റിനെക്കുറിച്ച് കേട്ടയുടൻ നാട്ടിലെ വംശീയ-വർഗീയ വാദികൾ ഒന്നടങ്കം അദ്ദേഹത്തെ ‘രാജ്യദ്രോഹി’ എന്ന് വിളിച്ചു തുടങ്ങിയിരിക്കുന്നു.
പുറംലോകം കാണാതെ ആജീവനാന്തം അദ്ദേഹത്തെ ജയിലിൽ അടയ്ക്കണമെന്ന് അവർ അലമുറയിടുകയാണ്. രാജ്യത്ത് കോൺഗ്രസുകാരും കമ്മ്യൂണിസ്റ്റ്കാരും ബിജെപിക്കാരും പലതരം ജനകീയ സമരങ്ങളിൽ പങ്കെടുക്കാറുണ്ട്. ഇവരെയെല്ലാം ആജീവനാന്തം ജയിലിലടയ്ക്കാൻ തുടങ്ങിയാൽ രാജ്യം തന്നെ ഒരു വലിയ ജയിലായിത്തീരും.
സോനം വാങ്ചുക്ക് ലോകം മുഴുവൻ അറിയപ്പെടുന്ന ഒരു ക്ലൈമെറ്റ് ആക്ടിവിസ്റ്റും സാമൂഹിക പരിഷ്കർത്താവും പരിസ്ഥിതി പ്രവർത്തകനും അതിലുപരിയായി വിദ്യാഭ്യാസ വിചക്ഷണനുമാണ്. അദ്ദേഹം അടിസ്ഥാനപരമായി ഒരു എഞ്ചിനീയറാണ്. ഇന്ത്യയിലെ ഏറ്റവും പ്രമുഖരായ ഇന്നൊവേറ്റീവ് സയന്റിസ്റ്റുകളിൽ ഒരാളാണ് വാങ്ചുക്ക്. മൻമോഹൻ സിംഗിൻ്റെ കാലത്ത് ഇന്ത്യ ഗവൺമെന്റിന്റെ വിദ്യാഭ്യാസ നവീകരണ പദ്ധതികളിൽ സജീവ അംഗവുമായിരുന്നു.
ചേതൻ ഭഗത് എഴുതി രാജ്കുമാർ ഹിറാനി സംവിധാനം ചെയ്ത ‘ത്രീ ഇഡിയറ്റ്സ്’ എന്ന സിനിമയിൽ അമീർഖാൻ അവതരിപ്പിക്കുന്ന ശാസ്ത്രജ്ഞനായ ഐ.ഐ.ടി വിദ്യാർത്ഥിയെ സോനം വാങ്ചുംങിൻ്റെ ജീവിതത്തിൽ നിന്നും പ്രചോദനം ഉൾക്കൊണ്ടാണ് രൂപപ്പെടുത്തിയിരിക്കുന്നത്. നമ്മുടെ രാജ്യത്തിന്, വിശേഷിച്ചും ലഡാക്കി ജനതയ്ക്ക് നിരവധി സംഭാവനകൾ നൽകിയ ഒരു വലിയ മനുഷ്യനാണ് അദ്ദേഹം.
അദ്ദേഹത്തിനെതിരെ അസഭ്യം പറയുന്ന വംശീയ-വർഗ്ഗീയ വാദികൾ അറിയാൻ വാങ്ചുക്കിനെക്കുറിച്ച് ഒരു ചെറിയ കാര്യം പറയാം. “2021 ഫെബ്രുവരിയിൽ, വാങ്ചുക്ക് ഇന്ത്യൻ സൈന്യത്തിനായി സൗരോർജ്ജത്തിൽ പ്രവർത്തിക്കുന്ന മൊബൈൽ ടെന്റുകൾ വികസിപ്പിച്ചെടുത്തു. ഓരോ ടെന്റിലും ഏകദേശം 10 സൈനികരെ ഉൾക്കൊള്ളാൻ കഴിയും. ഉയർന്ന പ്രദേശങ്ങളിൽ ഏകദേശം 50,000 ഇന്ത്യൻ സൈനികർ കഠിനമായ കാലാവസ്ഥയിൽ ജോലി ചെയ്യുന്നുണ്ടെന്ന് അറിഞ്ഞപ്പോഴാണ് വാങ്ചുക്ക് ഈ കണ്ടുപിടുത്തം നടത്തിയത്. ഈ ടെൻ്റുകൾ പകൽ സമയത്ത് താപോർജ്ജത്തെ പിടിച്ചെടുക്കുകയും രാത്രിയിൽ കൂടാരം ചൂടാക്കി നിലനിർത്താൻ ഈ ഊർജ്ജം ഉപയോഗിക്കുകയും ചെയ്യുന്നു.” സോനം വാങ്ചുക്കിനെ അറസ്റ്റ് ചെയ്തിരിക്കുന്നത് ജനങ്ങളെ കലാപത്തിന് പ്രേരിപ്പിച്ചു എന്ന കുറ്റം ചുമത്തിയാണെന്ന് മാധ്യമങ്ങൾ റിപ്പോർട്ട് ചെയ്യുന്നു.
അറസ്റ്റിൻ്റെ യഥാർത്ഥ കാരണങ്ങൾ സർക്കാർ വ്യക്തമാക്കിയിട്ടില്ലെന്നും റിപ്പോർട്ടുണ്ട്. ലേയിൽ ഇൻ്റർനെറ്റ് ബന്ധം വിച്ഛേദിച്ചിരിക്കുന്നു. സ്കൂളും കോളേജും സെപ്തം 27 വരെ അടച്ചിടാനും ഉത്തരവായിട്ടുണ്ട്.
