ഡൽഹി മദ്യനയവുമായി ബന്ധപ്പെട്ട അഴിമതിക്കേസിൽ ഡൽഹി മുഖ്യമന്ത്രി അരവിന്ദ് കെജ്രിവാളിന് ജാമ്യം അനുവദിച്ചു. സുപ്രീംകോടതിയാണ് കെജ്രിവാളിന്റെ ജാമ്യാപേക്ഷയ്ക്ക് അനുകൂല വിധി പറഞ്ഞത്. ജസ്റ്റിസ് സൂര്യകാന്തിന്റെ നേതൃത്വത്തിലുള്ള ബെഞ്ചാണ് ഈ വിധി പുറപ്പെടുവിച്ചത്. കെജ്രിവാൾ അഞ്ചുമാസമായി ജയിലിൽ കഴിയുന്ന സാഹചര്യത്തിലാണ് ജാമ്യം അനുവദിച്ചത്.
സിബിഐ രജിസ്റ്റർ ചെയ്ത അഴിമതിക്കേസിൽ ആദ്യം വിചാരണക്കോടതിയെ സമീപിക്കാത്തതിനാൽ സിബിഐ അദ്ദേഹത്തിന് ജാമ്യം അനുവദിക്കരുതെന്ന നിലപാട് സ്വീകരിച്ചിരുന്നുവെങ്കിലും, ഇത് കെജ്രിവാൾ ശക്തമായി എതിർത്തു. വിചാരണക്കോടതിയിലേക്ക് കേസിനെ വീണ്ടും കൈമാറുന്നത് “പാമ്പും കോണിയും കളി” പോലെയാകുമെന്ന് അദ്ദേഹം കോടതിയിൽ വാദിച്ചു.
മദ്യനയവുമായി ബന്ധപ്പെട്ട്, ഇതിനുമുമ്പ് എൻഫോഴ്‌സ്‌മെന്റ് ഡയറക്ടറേറ്റ് (ഇ.ഡി) രജിസ്റ്റർ ചെയ്ത കള്ളപ്പണം വെളുപ്പിക്കൽ കേസിലും കെജ്രിവാളിന് സുപ്രീംകോടതി ജാമ്യം അനുവദിച്ചിരുന്നു.