എഡിജിപി മന്ത്രിമാരുടെ ഫോൺ ചോർത്തുവെന്ന പി വി അൻവറിന്റെ ആരോപണം ഗൗരവകരമാണെന്ന് സിപിഐ സംസ്ഥാന സെക്രട്ടറി ബിനോയ് വിശ്വം. എഡിജിപി മന്ത്രിമാരുടെ ഫോൺ ചോർത്തുന്നത് വസ്തുതയെങ്കിൽ അതീവ ഗൗരവം ഉള്ളതാണ്. അൻവർ പൊലീസ് ഉദ്യോഗസ്ഥരുടെ ഫോൺ ചോർത്തിയെങ്കിൽ അതും ഗൗരവമുള്ളത് തന്നെ. ആ തെറ്റിന് ഈ തെറ്റ് പരിഹാരം അല്ല. ആരോപണങ്ങളുടെ ഗൗരവം ഉൾക്കൊള്ളാനുള്ള കെൽപ്പ് സിപിഐ (എം )നുണ്ട്.
എൽഡിഎഫിൽ പറയേണ്ടത് അവിടെ പറയുമെന്നും അദ്ദേഹം കൂട്ടിച്ചേർത്തു. ഇ പി ജയരാജനെ മുന്നണി കൺവീനർ സ്ഥാനത്ത് നിന്ന് നീക്കിയത് ഉചിതമായില്ലേ എന്ന ചോദ്യത്തിന് അല്ലെങ്കിൽ സിപിഐഎം തീരുമാനിക്കുമോ എന്നായിരുന്നു ബിനോയ്വിശ്വത്തിൻ്റെ മറുപടി. ഇ പി ജയരാജനും പ്രകാശ് ജാവേദ്കറുമായി കൂടിക്കാഴ്ച നടത്തിയപ്പോൾ തന്നെ സിപിഐ ഈ വിഷയത്തിലുള്ള നിലപാട് പറഞ്ഞിട്ടുണ്ട്. സിപിഐ- സിപിഐ എം വേദികളിലും അക്കാര്യം പറഞ്ഞിട്ടുണ്ടെന്നും അദ്ദേഹം കൂട്ടിച്ചേർത്തു. കോഴിക്കോട് മാധ്യമപ്രവർത്തകരോട് സംസാരിക്കുകയായിരുന്നു അദ്ദേഹം
